• 6. 
• கம்பன் காட்டும் சொர்க்கம்
• இராமாயணம் படைத்த கம்பருக்கும்
• சொர்க்கத்தின் கனவு இருந்தது!
• மண்ணுலகில் ஒரு சொர்க்கத்தை
• படைத்துக்காட்டுகிறார்!
• கம்ப இராமாயண
• பால காண்ட
• நாட்டு படலத்தில்
• ஒரு 60 பாடல்களில்
• தசரதன் ஆண்ட
• இராமர் பிறந்த
• கோசல நாட்டை
• மண்ணுலக சொர்க்கமென
• படைத்துக்காட்டுகிறார்!
• அவர் படைத்த பாடல்கள்
• அத்தனையும் சொக்கத்தங்கம்!
• அலை அலையாய் எழுந்து
• ஆனந்தமாய் இசைக்கும் சந்தம்!
• அவர் படைத்த சொர்க்கத்தின்
• அழகிற்காக புகழ்வதா?
• அவர் வடித்த அற்புத
• வரிகளுக்காக புகழ்வதா?
• எதை புகழ்வது என்று
• எனக்கு புரியவில்லை!
• மது உண்ட வண்டுபோல்
• மயங்கிக் கிடக்கிறேன்!
• மானுட வாழ்வைமட்டும்
• சொல்லவில்லை!
• ஆறுகள், மலைகள்,
• காடுகள், வயல்கள்
• செடிகள் கொடிகள்
• மரங்கள் மயில்கள்
• மான்கள் மீன்கள்
• வேலைகள் ஆலைகள்
• வளங்கள் நலங்கள்
• குணங்கள் மனங்கள் என
• எல்லாவையும் கண்முன்னே
• காட்சியாக விரிக்கின்றார்!
• கற்பனை தேரிலே ஏற்றி
• கனவிலே மிதக்க வைக்கின்றார்!
• அவர் படைத்ததில் பாதியைதான்
• நான் இங்கு
• உங்கள் ரசனைக்கு பகிர்கின்றேன்!
• இனி வருவனவற்றில்
• என் வரிகள் எதுவுமில்லை!
• கம்பன் படைத்த கவிதைக்கு
• யாரோ ஒரு கொம்பன்
• கொடுத்த உரைநடை!
• இரண்டையும் உங்கள்முன்
• வைக்கின்றேன்!
• நீங்களே அள்ளி பருகுங்கள்!
• ஆனந்தம் கொள்ளுங்கள்!
• மண்ணுலக சொர்க்கம்
• மீண்டும் வருமா என்ற
• ஏக்கம் வரும் என்றுமட்டும்
• நான் இங்கு ஓங்கி சொல்லுவேன்!
• கம்ப இராமாயணத்தின்மீது
• உங்களுக்கு உடனே
• ஒரு காதல் வரும் என்றுமட்டும்
• துணிந்து சொல்லுவேன்!
• இதோ உங்கள்முன்
• வைக்கின்றேன்!
• நீங்களே அள்ளி பருகுங்கள்!
• ஆனந்தம் கொள்ளுங்கள்!
• இன்னும் நான் உங்களுக்கு
• இங்கு எதற்கு தடை?
• இப்போதே சொல்லுகின்றேன்
• இன்பந்தரும் விடை!
• -------------------------------------------------------------------
• வரம்பு எலாம் முத்தம்; தத்தும் மடை எலாம் பணிலம்; மா நீர்க்
• குரம்பு எலாம் செம்பொன்; மேதிக் குழி எலாம் கழுநீர்க் கொள்ளை;
• பரம்பு எலாம் பவளம்; சாலிப் பரப்பு எலாம் அன்னம்; பாங்கர்க்
• கரும்பு எலாம் செந் தேன்; சந்தக் கா எலாம் களி வண்டு ஈட்டம்.
• (கம்ப-பால-நாட்டு-2)
• என்ன அருமையான சந்தம்! கம்பனின் வரிகள் எல்லாம் அமுதம்!
• வரப்பு எல்லாம் முத்து.
• மடை எல்லாம் சங்கு.
• ஈரநிலம் எல்லாம் பொன்.
• எருமைக் குழி எல்லாம் கழுநீர்ப் பூக்கள்.
• நீர்க்கரை எல்லாம் பவளம்.
• நெல்வயல் எல்லாம் அன்னம்.
• கரும்பு எல்லாம் தேன்கூடு.
• சந்தனக் காடு எல்லாம் மகிழ் வண்டுகள்.
• ஆறு பாய் அரவம், மள்ளர் ஆலை பாய் அமலை, ஆலைச்
• சாறு பாய் ஓதை, வேலைச் சங்கின் வாய்ப் பொங்கும் ஓசை,
• ஏறு பாய் தமரம், நீரில் எருமை பாய் துழனி, இன்ன
• மாறு மாறு ஆகி, தம்மில் மயங்கும்-மா மருத வேலி.
• (கம்ப-பால-நாட்டு-3
• கம்பன் கவிதை காதில் பாய்ந்தால்
• இன்பம் மனதில் எப்படி பாய்கிறது!
• ஆறு பாயும் ஓசை.
• உழவர் கரும்பாலையில் பாயும் ஆரவாரம்.
• கரும்புச்சாறு பாயும் ஓசை.
• கடலில் சங்கு வாய் பொங்கும் ஓசை.
• காளைகள் முட்டி பாயும் முனைப்பு.
• நீரில் எருமை பாயும் மகிழ்ச்சி.
• இப்படி மாறி மாறி பாய்ந்து,
• மயங்கும் மருதநிலம்.
• தண்டலை மயில்கள் ஆட, தாமரை விளக்கம் தாங்க,
• கொண்டல்கள் முழவின் ஏங்க, குவளை கண் விழித்து நோக்க,
• தெண் திரை எழினி காட்ட, தேம் பிழி மகர யாழின்
• வண்டுகள் இனிது பாட, -மருதம் வீற்றிருக்கும் மாதோ.
• (கம்ப-பால-நாட்டு-4)
• என்ன அழகிய காட்சி?
• இன்பத்திற்கு இதுவன்றோ சாட்சி?
• மருதம் என்னும் சோலையில்
• மயில்கள் ஆட,
• தாமரை அதற்கு
• விளக்கு தாங்க,
• மேகங்கள் இடி முழங்க,
• குவளைமலர்கள் கண்விழித்து பார்க்க,
• நீரலைகள் ஆட்டத்துக்குத் திரையாக,
• தேன் உண்ட வண்டுகள் மகரயாழ் இசைக்க,
• மருதம் மகிழ்ச்சி கொண்டதன்றோ!
• (நீரிடை உறங்கும் சங்கம்; நிழலிடை உறங்கும் மேதி;
• தாரிடை உறங்கும் வண்டு; தாமரை உறங்கும் செய்யாள்;
• தூரிடை உறங்கும் ஆமை; துறையிடை உறங்கும் இப்பி;
• போரிடை உறங்கும் அன்னம்; பொழிலிடை உறங்கும் தோகை.)
• (கம்ப-பால-நாட்டு-6)
• இன்ப துய்ப்பில் பொங்கும் உறக்கம்!
• இக்கவிதை பயின்றால் வாராதோ மயக்கம்!
• நீரில் உறங்கும் சங்கு,
• நிழலில் உறங்கும் எருமை,
• தாமரையில் உறங்கும் திருமகள்,
• புதரில் உறங்கும் ஆமை,
• நீர்த்துறைகளில் உறங்கும் சிப்பி,
• வைக்கோல் போரில் உறங்கும் அன்னம்,
• சோலையில் உறங்கும் மயில்கள்!
• (ஆலைவாய்க் கரும்பின் தேனும், அரி தலைப் பாளைத் தேனும்,
• சோலை வீழ் கனியின் தேனும், தொடை இழி இறாலின் தேனும்,
• மாலைவாய் உகுத்த தேனும்,-வரம்பு இகந்து ஓடி வங்க
• வேலைவாய் மடுப்ப உண்டு மீன் எலாம் களிக்கும் மாதோ.)
• (கம்ப-பால-நாட்டு-9)
• கம்பன் கவித்தேன் மலைத்தேன் சுவைத்தேன்
• களித்தேன் காண வந்த வேலையை மறந்தேன்!
• ஆலையில் பிழியும் கரும்புத்தேன்,
• பாளையில் இறங்கும் கள்ளெனும் தேன்,
• சோலையில் விழும் பழத்தேன்,
• கட்டு உடைந்து கொட்டும்
• தேன் கூட்டுத் தேன்,
• மக்கள் அணிந்திருக்கும்
• மாலைகளில் வழியும் தேன்;
• இவை எல்லாம் பெருக்கெடுத்து
• வங்கக் கடலில் கலக்கும் தேன்!
• மீன்கள் எல்லாம் உண்டு களிக்கும் தேன்!
• வெண் தளக் கலவைச் சேறும், குங்கும விரை மென் சாந்தும்,
• குண்டலக் கோல மைந்தர் குடைந்த, நீர்க் கொள்ளை சாற்றின்,
• தண்டலைப் பரப்பும் சாலி வேலியும் தழீஇய வைப்பும்,
• வண்டல் இட்டு ஓட மண்ணும் மதுகரம் மொய்க்கும் மாதோ.
• (கம்ப-பால-நாட்டு-12
• பூவில் தேனீ மொய்க்கும்!
• கம்பன் பாவில் கண்ணும் மனமும்
• காலமெல்லாம் மொய்க்கும்!
• குண்டலம் பூண்ட கோலத்துடன்
• மைந்தர் நீராடும்போது
• அவர்கள் பூசிய
• வெண்ணிறக் கலவைக் குழம்பும்,
• மணக்கும் சந்தனமும்,
• கலந்த நீர் பாய்ந்து
• சோலையும் மண்ணும் மணப்பதால்
• வண்டுகள் மொய்க்கும் போது,
• மது உண்ட வண்டாய் ஆடவர் மொய்ப்பரன்றோ?
• பொருந்திய மகளிரோடு வதுவையில் பொருந்துவாரும்,
• பருந்தொடு நிழல் சென்றன்ன இயல் இசைப் பயன் துய்ப்பாரும்,
• மருந்தினும் இனிய கேள்வி செவி உற மாந்துவாரும்,
• விருந்தினர் முகம் கண்டன்ன விழா அணி விரும்புவாரும்;
• (கம்ப-பால-நாட்டு-15)
• கம்பன் கவிதைக்கு இல்லை சரிவு!
• இன்பக்களிப்புக்கு இல்லை முடிவு!
• விரும்பும் மகளிரோடு விரும்பித் தழுவியும்,
• பருந்து பறக்க நிழல் பறப்பது போல
• இயல் இசை இரண்டையும் துய்த்தும்,
• மருந்து போல் உதவும் சொற்களைக் கேட்டும்,
• விருந்தினர் முகத்தைக் கண்டது போல்
• விழாக் கொண்டாடியும்
• மக்கள் பொழுது போக்கினரன்றோ?
• கறுப்புறு மனமும், கண்ணில் சிவப்புறு சூட்டும் காட்டி,
• உறுப்புறு படையின் தாக்கி, உறு பகை இன்றிச் சீறி,
• வெறுப்பு இல,களிப்பின் வெம் போர் மதுகைய, வீர ஆக்கை
• மறுப்பட, ஆவி பேணா வாரணம் பொருத்துவாரும்;
• (கம்ப-பால-நாட்டு-16)
• போர் இல்லையென்றால் வீரனுக்கு என்ன வேலை?
• காட்டுகிறது அதனை கம்பன் கவிச்சோலை!
• நெஞ்சில் உறுதியும், கண்ணில் சிவப்பும் காட்டி,
• பகைமை இல்லா படைக்கலம் போல
• ஒருவரை ஒருவர் தாக்கிப்
• பயிற்சி செய்துகொள்ளும்
• வீரர்களின் வாழ்க்கை
• கோழிப் போர் போல் காணுமன்றோ?
• முள் அரை முளரி வெள்ளை முளை இற, முத்தும் பொன்னும்
• தள்ளுற, மணிகள் சிந்த, சலஞ்சலம் புலம்ப, சாலில்
• துள்ளி மீன் துடிப்ப, ஆமை தலை புடை கரிப்ப, தூம்பின்
• உள் வரால் ஒளிப்ப, -மள்ளர் உழு பகடு உரப்புவாரும்;
• (கம்ப-பால-நாட்டு-18)
• வயலின் வளம் காட்டும் கண்காட்சி!
• கம்பன் திறன் காட்டும் சொல்லாட்சி!
• உழவர்கள் உழும் எருதுகளை
• அதட்டிக்கொண்டு ஓட்டினர்.
• அவர்கள் உழும்போது
• முள்ளுத் தாமரையின்
• வெள்ளை நிற முளைகள்
• அறுந்து போயின.
• முத்தும் பொன்னும் மணிகளும் சிந்தின.
• வயலில் கிடக்கும் சங்குகள் ஒலித்தன.
• மீன்கள் துள்ளித் துடித்தன.
• ஆமைகள் முதுகைச் சொரிந்துகொண்டன.
• வரால் மீன்கள் ஓடி ஒளிந்துகொண்டன.
• எறிதரும் அரியின் சும்மை எடுத்து வான் இட்ட போர்கள்
• குறிகொளும் போத்தின் கொல்வார்; கொன்ற நெல் குவைகள் செய்வார்;
• வறியவர்க்கு உதவி, மிக்க, விருந்து உண மனையின் உய்ப்பார்,
• நெறிகளும் புதைய, பண்டி நிறைத்து, மண் நெளிய ஊர்வார்.
• (கம்ப-பால-நாட்டு-20)
• கதிர் படு வயலின் உள்ள, கடி கமழ் புனலின் உள்ள,
• முதிர் பயன் மரத்தின் உள்ள, முதிரைகள் புறவின் உள்ள,
• பதிபடு கொடியின் உள்ள, படி வளர் குழியின் உள்ள,
• மதுவளம் மலரில் கொள்ளும் வண்டு என மள்ளர் கொள்வார்.
• (கம்ப-பால-நாட்டு-21)
• சுழன்றும் ஏர் பின்னது உலகு என்பதை
• எடுத்துக்காட்டும் கம்பன் கவிதை!
• நெல்லை அறுத்துக் கொண்டுவந்து
• களத்தில் போர் அடிப்பர்.
• நெல்லை வறியவர்களுக்கு வழங்குவர்.
• விருந்தினர் உண்ண வேண்டும் என்று
• வண்டிகளில் ஏற்றி மண்ணே நெளியுமாறு
• வீட்டுக்குக் கொண்டுவருவர்.
• விளைவயல், பொழில், பழுத்த மரங்கள்,
• முல்லை நிலத்துத் துவரை,
• பதியக் கொடியின் காய்கள்
• ஆகியவற்றை மலரிலுள்ள தேனைக்
• கொண்டு செல்லும் வண்டுகள் போல
• உழவர்கள் கொண்டுவருவர்.
• (தோயும் வெண் தயிர் மத்து ஒலி துள்ளவும்,
• ஆய வெள் வளை வாய்விட்டு அரற்றவும்,
• தேயும் நுண் இடை சென்று வணங்கவும்,
• ஆயர் மங்கையர் அங்கை வருந்துவார்.)
• (கம்ப-பால-நாட்டு-28)
• (வள்ளி கொள்பவர் கொள்வன மா மணி;
• துள்ளி கொள்வன தூங்கிய மாங்கனி;
• புள்ளி கொள்வன பொன் விரி புன்னைகள்;
• பள்ளி கொள்வன பங்கயத்து அன்னமே.)
• (கம்ப-பால-நாட்டு-33)
• நாட்டு வளத்தை காட்டும் கவிதைகள்
• ஏட்டிலும் பாட்டிலும் இறவாத விதைகள்!
• தயிர் கடையும் மத்தொலி கேட்கும்.
• கடையும் கையிலுள்ள வளையல்
• வாய் விட்டு அலறும்.
• நுண்ணிய இடை வளையும்.
• இதனால் ஆய்ச்சியர் வருந்துவர்.
• வள்ளிக் கிழங்கு தோண்டுபவர்
• மணிகளைப் பெறுவர்.
• மாம்பழங்களைத் துள்ளிக் குதித்துப் பறிப்பர்.
• புன்னை மரங்கள் புள்ளி புள்ளியாகப் பூக்கும்.
• தாமரையில் அன்னம் உறங்கும்.
• பெருந் தடங் கண் பிறைநுதலார்க்கு எலாம்,
• பொருந்து செல்வமும் கல்வியும் பூத்தலால்,
• வருந்தி வந்தவர்க்கு ஈதலும், வைகலும்,
• விருந்தும் அன்றி விளைவன யாவையே?
• (கம்ப-பால-நாட்டு-36)
• செல்வமும் கல்வியும் மகளிர் எய்தினால்
• நிலவும் நிலையை அன்றே நிறுவிய
• கம்பனின் கவித்திறன் என்னே என்ப!
• மகளிர்க்கு அவர்களின் கண்களைப் போல
• செல்வமும் கல்வியும் பூத்தன.
• அதனால் வருந்த வந்தவர்களுக்கெல்லாம்
• வழங்குவதும், நாள்தோறும் விருந்தோம்புதலும் அன்றி
• வேறு விருப்பம் இல்லாதவர்களாக
• அவர்கள் இருந்தனர்.
• கலம் சுரக்கும் நிதியம்; கணக்கு இலா
• நிலம் சுரக்கும் நிறை வளம்; நல் மணி
• பிலம் சுரக்கும்; பெறுதற்கு அரிய தம்
• குலம் சுரக்கும், ஒழுக்கம்-குடிக்கு எலாம்.
• (கம்ப-பால-நாட்டு-38)
• எத்தனை சுரக்கும் இன்ப சுரங்கம்!
• பித்தினை ஆக்கும் கவி அரங்கம்
• கப்பல் நிதியத்தையும்,
• நிலம் வளத்தையும்,
• நிலத்தடி மணிகளையும்,
• மக்கள் குலம் குடிமக்களுக்கு
• ஓழுக்கத்தையும் சுரந்தன.
• கூற்றம் இல்லை ஓர் குற்றம் இலாமையால்;
• சீற்றம் இல்லை தம் சிந்தையின் செம்மையால்;
• ஆற்ற நல் அறம் அல்லது இலாமையால்,
• ஏற்றம் அல்லது இழிதகவு இல்லையே.
• (கம்ப-பால-நாட்டு-39)
• இப்படி ஒரு உலகம் உண்டானால்,
• சொர்க்கத்தின் வாசல் திறக்குமன்றோ?
• நாட்டில் குற்றமே இல்லாததால்
• தண்டனை என்பதே இல்லை.
• எண்ணங்கள் செவ்விதாக இருப்பதால்
• யாரிடமும் சினமே இல்லே.
• ஆற்றல் மிக்க நல்லறம் அல்லது
• அல்லறம் இல்லாமையால்
• உயர்வோ இழிவோ யாருக்கும் இல்லை.
• விதியினை நகுவன அயில் விழி; பிடியின்
• கதியினை நகுவன அவர் நடை; கமலப்
• பொதியினை நகுவன புணர் முலை,கலை வாழ்
• மதியினை நகுவன வனிதையர் வதனம்.
• (கம்ப-பால-நாட்டு-44)
• வாய்விட்டு சிரித்தால் நோய்விட்டு போகும்!
• காயும் உடனே கனியும் கவிகேட்டுவிட்டால்!
• விதியைப் பார்த்து
• உழத்தியர் விழிகள் சிரித்தன.
• கதியைப் பார்த்து
• அவர்களின் நடை சிரித்தது.
• தாமரை மொட்டைப் பார்ந்து
• அவர்களின் தனங்கள் சிரித்தன.
• கலை நிறைந்த நிலவைப் பார்த்து
• அவர்களின் முகம் சிரித்தது.
• பகலினொடு இகலுவ படர் மணி; மடவார்
• நகிலினொடு இகலுவ நளி வளர் இளநீர்;
• துகிலினொடு இகலுவ சுதை புரை நுரை; கார்
• முகிலினொடு இகலுவ கடி மண முரசம்.
• (கம்ப-பால-நாட்டு-45)
• போட்டி என்றால் கூட்டும் பரவசந்தான்!
• பாட்டு என்றால் அது கம்பன் கவிரசந்தான்!
• அவர்கள் அணிந்திருந்த மணிகள்
• பகலோடு போட்டி போட்டுக்கொண்டன.
• அவர்களின் தனங்களோடு
• இளநீர் போட்டியிட்டது.
• நீரில் நின்ற வெள்ளை நுரை
• அவர்களின் ஆடையோடு போட்டியிட்டது.
• அவர்களின் மண முரசம்
• முழங்குவது போல இடி முழங்கியது.
• காரொடு நிகர்வன கடி பொழில்; கழனிப்
• போரொடு நிகர்வன புணர்மலை; அணை சூழ்
• நீரொடு நிகர்வன நிறை கடல்; நிதி சால்
• ஊரொடு நிகர்வன இமையவர் உலகம்.
• (கம்ப-பால-நாட்டு-46)
• ஒப்பில்லை உயர்வில்லை தப்பில்லை தளர்வில்லை!
• கம்பன் பாட்டிற்கு முன்நிற்க எதுவும் வரவில்லை!
• கார் மேகமும் பொழிலும்
• ஒப்பாய் நின்றன.
• உழவர் கழனியில் இட்ட போரும்
• இமய மலையும்
• ஒப்பாகத் தோன்றின.
• வயலிலுள்ள நீரும் கடலும்
• ஒப்பாகத் திகழ்ந்தன.
• இங்குள்ளவரின் செல்வ வளம்
• மிக்க ஊரும் வானுலகமும்
• ஒப்பாகத் தோன்றின.
• நெல் மலை அல்லன நிரை வரு தரளம்;
• சொல் மலை அல்லன தொடு கடல் அமிர்தம்;
• நல் மலை அல்லன நதி தரு நிதியம்;
• பொன் மலை அல்லன மணி படு புளினம்.
• (கம்ப-பால-நாட்டு-47)
• நிலம் என்றால் இது நிலம்!
• வளம் என்றால் இது வளம்!
• இது நெல் மலை அல்ல!
• அதுபோலுள்ள இதுவென்ன?
• இது கடலோரத்தில் குவிந்திருக்கும்
• முத்துக் குவியல் தான்!
• இது வாயில் வரும் சொல் மலை அல்ல!
• அதுபோலுள்ள இதுவென்ன?
• பாற்கடலில் தோன்றிய அமிழ்தந்தான்!
• இது உண்மையான மலை அல்ல!
• அதுபோலுள்ள இதுவென்ன?
• அந்த நாட்டு ஆறுகள் கொண்டுவந்த
• நிதிக் குவியல்தான்!
• இது பொன் மலை அல்ல!
• அதுபோலுள்ள இதுவென்ன?
• இது மணிகள் குவிந்து கிடக்கும்
• மணல் குவியல் தான்!
• பந்தினை இளையவர் பயில் இடம் மயில் ஊர்
• கந்தனை அனையவர் கலை தெரி கழகம்;
• சந்தன வனம் அல, சண்பக வனம் ஆம்;
• நந்தன வனம் அல, நறை விரி புறவம்;
• (கம்ப-பால-நாட்டு-48)
• இளைஞர் விளையாடும் களம்
• இன்பம் தரும் வளம்!
• இளைஞர் பந்தாடும் இடம்
• மயிலில் ஊர்ந்து செல்லும்
• முருகனைப் போன்றவர்
• கலைகளைப் பயிலும் இடமாகும்.
• அங்கு உள்ளவை
• சந்தன வனம் அன்று;
• சண்பகப் பூ பூத்துக்கிடக்கும் வனம்.
• அங்கு இருப்பவை நந்தவனம் அல்ல,
• மணம் கமழும் முல்லை நிலம்.
• கோதைகள் சொரிவன குளிர் இள நறவம்;
• பாதைகள் சொரிவன பரு மணி கனகம்;
• ஊதைகள் சொரிவன உறை உறும் அமுதம்;
• காதைகள் சொரிவன செவி நுகர் கனிகள்;
• (கம்ப-பால-நாட்டு-51)
• இன்பம் சொரிவது கம்பன் பாட்டு!
• இல்லை மாற்று என்றே சாற்று!
• மாலைகள் சொரிவது தேன்.
• பாதை வழிகள் சொரிவது மணிக்கற்கள்.
• ஊதைகள் (வாடைக் காற்று) சொரிவது
• உறையும் நீர்த்துளி.
• சொல்லும் காதைப் பாட்டு சொரிவது
• காதுக்கு உகந்த கனிகள்.
• வண்மை இல்லை ஓர் வறுமை இன்மையால்;
• திண்மை இல்லை ஓர் செறுநர் இன்மையால்;
• உண்மை இல்லை பொய் உரை இலாமையால்;
• வெண்மை இல்லை பல் கேள்வி மேவலால்.
• (கம்ப-பால-நாட்டு-53)
• சொர்க்கம் இதுதான் என்று சொல்ல
• இதுவன்றோ காரணம்:
• இங்கிதுவெல்லாம் இனியாவது
• இனிதே மாறணும்!
• கோசல நாட்டில் வள்ளண்மை இல்லை;
• காரணம் வறுமையுற்று வாங்குவோர் இல்லை!
• வலிமை இல்லை;காரணம் போரிடுவோர் இல்லை!
• உண்மை இல்லை;காரணம் பொய்யே இல்லை!
• அறியாமை என்னும் வெண்மை இல்லை;
• காரணம் பல நல்லனவற்றை மக்கள் சொல்வதால்!
• கூறு பாடலும், குழலின் பாடலும்,
• வேறு வேறு நின்று இசைக்கும் வீதிவாய்,
• 'ஆறும் ஆறும் வந்து எதிர்ந்த ஆம்' என,
• சாறும் வேள்வியும் தலைமயங்குமே.
• (கம்ப-பால-நாட்டு-56)
• எத்தனை பாடல், எத்தனை பாடல்?
• அத்தனையும் கம்பன் புகழ் பாடும்!
• வாயில் வரும் பாட்டும்,
• குழலில் வரும் பாட்டும்
• வெவ்வேறு தெருக்களில் இசைக்கும்.
• இவை ஆறும் ஆறும் எதிர்த்துக்கொண்டு
• ஒன்று கலப்பது போல
• ஊரில் திருவிழாவும்,
• வேள்வியும் ஆங்காங்கே நிகழும்.
• மூக்கில் தாக்குறும் மூரி நந்தும்; நேர்
• தாக்கின் தாக்குறும் பறையும், தண்ணுமை
• வீக்கின் தாக்குறும் விளியும், -மள்ளர்தம்
• வாக்கின் தாக்குறும் ஒலியில் மாயுமே.
• (கம்ப-பால-நாட்டு-57)
• சங்கு முழங்க பறை அதிர தினம்
• பொங்கும் பாடல் தங்கும் மனம்!
• மூக்கில் வாய் வைத்து ஊதும் சங்கு,
• அடித்துத் தாக்கும் பறை,
• உரசித் தாக்கும் தண்ணுமை
• ஆகியவற்றின் ஒலிகள்
• உழவர் ஒலியில் அடங்கிப் போகும்.
• (பொற்பின் நின்றன பொலிவு; பொய் இலா
• நிற்பின் நின்றன நீதி; மாதரார்
• அற்பின் நின்றன அறங்கள்; அன்னவர்
• கற்பின் நின்றன கால மாரியே.)
• (கம்ப-பால-நாட்டு-59)
• அன்பும், பண்பும் அறமும் நிறைந்தால்
• அதனினும் சொர்க்கம் வேறு உளதோ?
• பொன்னைப் போன்ற பண்பில்
• பொலிவு நிற்கும்.
• பொய்மை இல்லாத நடத்தையில்
• நீதி நிற்கும்.
• மகளிர் அன்பில்
• அறநெறி நிற்கும்.
• மகளிர் கற்பில்
• பருவ மழை நிற்கும்.
• (சொர்க்கத்தின் பயணம் தொடரும்...)
• ********************************************************************************
• ********************************************************************************